Changma Pacchan Book Application For Android System
গুলদক্ কধা
------------------

'চাংমাহ্ পচ্ছন্' বোইবো ভালক্ ভিলোন্ আগে ১৪০৯ বাংলা সালত্ আগর্তলা ত্রিপুরাত্তুন্ ছাবা ওহ্‌ইয়্যে। এ পচ্ছনুন্ থুবানা আ কাবিদ্যাং গরানা কামান্ গচ্যা দাংগু নিরঞ্জন্ চাংমাহ্দাগি। তারারে অতালেয়্যে ভালেদি আ সাধুবাদ্ জানাঙর্। এ বোইবো তে বাংলা অহ্‌রগে আ চাংমাহ্ কধাদি ছাবেয়্যে। মুই ইবেরে চাংমাহ্ অহ্‌রগে ছাবেবার্ মন্‌জুক্ গচ্যং। মর্ তাক্ অহ্‌লদে, চাংমাহ্ লেঘা আ চাংমা ভাঝ কোচপেইয়েগুনরে চাংমাহ্ সাহিত্য পড়িবার্ জু তুলি দেনা আ ন-জানিয়েগুনরে চাংমাহ্ সাহিত্য চর্চা গরিবার উস্সো তুলি দেনা। বি. জ্যোতি ভান্তে ইবেরে্ বাংলা অহ্‌রগে চাংমা কধন্দি এ্যান্ড্রয়েড অ্যাপ বানেয়্যে। বেগিদো মান্‌জ্যরে অাহ্‌বিলেচ হাদে সুনা যায়্, চাংমাহ্ লেঘা আ চাংমা সাহিত্য চর্চা গরিনেই কি অহ্‌ব। চাংমাহ্ লেঘা আ চাহিত্যর দ সেধক কন বোই নেই। সিগিলে-ও বানপানি ধক্ ঝুরুত্ গরি লামি যায়্। হাক্কে পুরি ফেলা যায়্। চাংমাহ্ ভাঝে যে অ্যাপ নেই সে অভাপ্পান্ ভচ্ নেজেবাত্যায়্ আমার্ এই চিগোন্-চাগোন্ আ লদক্-ধাদক্ চেচ্তা। তমা বেক্কুনর্ আহ্ওজর্ এহ্‌জাল্ পেলে আহ্‌দা-আহ্‌ত্যা বলা-বল্যা চাংমাহ্ লেঘায়্ আর ভেবেরাদ্যা বোই ছাবেবার্ আ এন্ড্রয়েড অ্যাপ বানেবার আঝা রাঘেই। চাংমাহ্ লেঘায়্ ছড়া, কবিতা, কিত্তো, পচ্ছন্ আ নানান্ বেগিদো বিসয়ে কারত্তুন্ বোই ছাবেবার্ মন্‌জুক্ অহ্‌লে মল্লোই কধা কবার্ কুজোলি থেল।

এ বোইবো ছাবেবার্ আগে মুই কাবিদ্যাং দাংগু নিরন্‌জন্ চাংমাহ্দাগি লোই যোগাযোগ্ গরিবার্ চেয়ং। হালিক্ বেগিদো চেচ্তা গরিগরায়্-ও যোগাযোগ্ গরি ন পারং। সেচ্‌মেচ্ তারার্ অনুমাতি ছারায়্ বোইবো ছাবা অহ্‌ল অা এ্যান্ড্রয়েড অ্যাপ বানা অহ্‌ল।। আঝা গরং, মনত্ দুক্ ন পেনেই দাংগুদাগি চাংমাহ্ ভাচ্ আ লেঘা ছিদি দেনা আ ভালেদি কধা ভাবিনেই আমার এ কামানরে সাধুবাদ্ জানেবাক্। আমার্ তাক্ অহ্‌লদে চাংমাহ্ লেঘা আ ভাঝে সাহিত্য চেরকিত্যা ছিদি দেনা আ ভালেদ মুক্যা উজেই নেজানা।

দাংগু নিরঞ্জন্ চাংমাহ্দাগির্ আগ বোইবোত্ পচ্ছনুনো লঘে কন আগেয়ে ছবি ন এলাক্। এবারা আমি বোইবো যাতে আর পর্‌‌তে গম্ লাগে সেনত্যায়্ বেক্ পচ্ছনুনো লঘে গত্ গত্ আগেয়ে ছবি বাজেই দিয়েই। ভজান্ দুক্ গরি পচ্ছনুন্ পরিপারায়্ পচ্ছন্ মুজিম্ দোল্‌-দোল্ ছবিগুন্ আগেই দিয়ে দাংগু শুপংকর্ চাংমাহ্। তার্ আগেয়ে ছবিগুন্ চেই চেই পচ্ছনুন্ পড়দে বেক্কুনর্ গম্ লাগিবো ভিলি আঝা গরং। সেনত্যায়্ দাংগু শুপংকররে চিত্‌‌দীঘোল্ ভালেদি জানাঙর্।

চাংমাহ্ লেঘাদি বোই ছাবানা কামান্ অমকদ আগাত্যা। কারণ, চাংমাহ্ লেঘাগুন্ এঝ অমকদ গর্‌‌ভেল্। তে এক্ ধগে লেঘে, তে এক্ ধগে লেঘে। সেনত্যায়্ এ বোইবো ছাবেবার্ আগে আমি কয়েক্‌জনে তেম্মাং-সুল্লুক্ গরি আমি কন্ সুদোমান্ আহ্দেনেই লিঘিবং সিয়ান্ ঠিক্ গচ্‌ছেই। ঠিক্ সে সুদোমানাইো আমি এ বোইবোত্ আহ্দেয়েই। আর্ ভজান্ দুক্-কচ্ত গরি গ্যানশান্ত ভান্তে-বো গোদা বোইবো বাংলা অহ্‌রগত্তুন্ চাংমাহ্ অহ্‌রগে বোদোলেয়্যে আ সে সমারে কম্‌‌পিউটার্ কম্‌‌পোজ্ কামান তে নিজে গজ্যে। এ্যাপ বানেবাল্লায় বি. জ্যোতি ভান্তে চাংমা অহ্‌রগত্তুন গদা বইবো বাংলা অহ্‌রগে বানেইয়্যে। সেনত্যায়্ তারারে অতালেয়্যে চিত্‌‌দীঘোল্ ভালেদি জানাঙর।

বেগ থুমেন্দি এ 'চাংমাহ্ পচ্ছন্' এ্যাপ-পো আ বোইবো পোর্‌‌বোগুনর্ যুনি গম্ লাগে আ চাংমা লেঘার থিদি আ ভালেদি কামত্ এক্ নক্কুনি-ও এহ্‌জাল্ অহ্‌য়্, সালেন্ আমার্ টেঙা ধালানা আ কচ্ত গরানা ইহ্‌ল্ অহ্‌ব।

--------------------
করুণাবংশ ভান্তে