Stichting Maneho di Aruba su Carnaval (SMAC) ta e fundacion oficial pa organisa Carnaval di Aruba. SMAC a wordo funda na November 2014. E aña aki, SMAC ta celebra su prome lustro como e fundacion encarga cu Aruba su Carnaval. Smac ta conta cu un directiva di boluntarionan cu ta traha pa engrandece Carnaval di Aruba tur aña. Nan prome actividad cu lo start e periodo di Carnaval ta 11 di november pa 11or y 11 minuut (11.11.11). Pa e dia aki, e Calendario di Eventonan y Ruta di Paradanan ya ta cla hinca den otro.

E aña aki, Aruba ta celebra 65 aña di e manifestacion cultural aki den tur grandesa y luho. Carnaval di Aruba semper ta conta cu admiracion di publico local y internacional. SMAC ta conta cu sosten financiero di sponsornan kendenan tur aña ta cla pa yuda brinda Aruba un miho fiesta di Carnaval y ta haci posibel pa cada aña nos Carnaval ta briya mas tanto pa nos como internacionalmente. Carnaval di Aruba ta cay bou di Ministerio di Cultura di Aruba y Minister Xiomara Ruiz-Maduro. Carnaval ta nos cultura, nos tin cu bib’e!