Shayx Muhammad Sodiq Muhammad Yusuf ibn Muhammad Ali (1952-2015) Oʻrta Osiyo va Qozogʻiston musulmonlari diniy boshqarmasining muftiysi (1989-1993). Islom ulamolari millatlararo ittifoqining aʼzosi.

1952-yil 15-aprelda Andijon viloyati Asaka tumani, Niyozbotir qishlogʻida tugʻilganlar.
1970-yilda Buxorodagi Mir Arab madrasasiga oʻqishga qabul qilindi. Keyinchalik Toshkent islom institutida tahsil olib, 1975-yilda tamomladilar.
1976-yilda Liviyadagi Islom universitetiga qabul qilindi va 1980-yilda tamomladilar.
1980-1986 yillarda Oʻrta Osiyo va Qozogʻiston musulmonlari diniy boshqarmasi xalqaro aloqalar boʻlimi xodimi va Toshkent islom instituti oʻqituvchisi boʻlgan.
1986-1989 - Toshkent islom instituti rektori.
1989-1993 - Oʻrta Osiyo va Qozogʻiston musulmonlari diniy boshqarmasi raisi, Oliy Sovet deputati.
1993-2001 - Liviyadagi Islom universiteti oʻqituvchisi.
2001-2015 - Oʻzbekiston musulmonlari idorasi ulamolar kengashi aʼzosi.
2015-yil 10-mart kuni yurak infarktidan vafot etdilar.

Alloh taolo: «Albatta, Allohdan bandalari ichida faqat olimlargina qo‘rqarlar», degan (Fotir surasi, 28-oyat).

Rasululloh sollallohu alayhi vasallam: «Olimlar anbiyolarning vorislaridir. Anbiyolar dinor ham, dirham ham meros qoldirmaganlar. Ular ilmni meros qoldirganlar. Kim uni olsa, ulug‘ nasibani olibdi», deganlar (Abu Dovud va Termiziy rivoyat qilgan).

Shayx Muhammad Sodiq Muhammad Yusuf rahimahulloh yetuk alloma, mufassir, muhaddis, faqih, murshid, o‘z zamonasidagi Islom olamining yirik namoyandasi, ulkan arbob, SSSR Oliy Kengashining xalq deputati, O‘rta Osiyo va Qozog‘iston musulmonlari diniy idorasining sobiq muftiysi, mustaqil O‘zbekistonning birinchi muftiysi, ko‘plab xalqaro ilmiy muassasalar, diniy tashkilotlarning aʼzosi, Movarounnahr xalqlarining diniy rahnamosi edilar.

Shayx Muhammad Sodiq butun umrini «Ahli sunna val jamoa mazhabi asosida pok aqiyda va musaffo Islomga intilish, Qurʼon va Sunnatni o‘rganib, amal qilish, islomiy maʼrifat taratish, salafi solih – ulug‘ mujtahidlarga ergashish, bag‘rikenglik va birodarlik ruhini taratish, diniy savodsizlikni tugatish, ixtilof va firqachilikka barham berish, mutaassiblik va bidʼat-xurofotlarni yo‘qotish» shiori ostida Alloh taoloning haq diniga, U Zotning mahbub Payg‘ambari Muhammad mustafo sollallohu alayhi vasallam keltirgan risolatni targ‘ib qilishga baxshida qilib o‘tgan saodatmand inson edilar.

Shayx Muhammad Sodiq Muhammad Yusuf hijriy 1371 yil 21 rajab, milodiy 1952 yil 15 aprel kuni O‘zbekiston Respublikasi, Andijon viloyatining Asaka tumanidagi Niyozbotir qishlog‘ida, Muhammad Yusuf domla xonadonida tavallud topdi. Boshlang‘ich diniy taʼlimni otasi Muhammad Yusuf domladan oldi. U kishidan asosan tajvid, arab tili grammatikasi – sarf va nahv ilmlarini o‘rgandi va Qurʼondan bir necha juzlarni yod oldilar.

1969 yili Buloqboshi qishlog‘idagi o‘rta maktabni tugatib, 1970 yili Buxorodagi Mir Arab madrasasiga o‘qishga kirdilar.

Sobiq Ittifoq bo‘yicha u davrdagi yagona diniy taʼlim muassasasi Buxorodagi Mir Arab madrasasi edi. Madrasada Ittifoqning turli yurtlaridan kelgan har xil millat vakillari taʼlim olishar edi. Muhammad Sodiq Muhammad Yusuf ularning ichida peshqadami, aʼlochisi edilar.

Madrasada qiroatdan Shahobiddin qori domladan dars oldi. Nahv ilmidan esa Muxtorjon domladan, arab adabiyoti va muhovaradan Usmonjon domladan, fiqhdan Safiyyulloh domla va Qosimjon domlalardan, tafsirdan Abdulatif domladan taʼlim oldilar.

1971 yili Imom Buxoriy nomidagi Toshkent Islom oliy maʼhadi ochilib, u yerda o‘qishga o‘sha davrdagi sobiq Ittifoq jumhuriyatlaridagi masjid imomlari bilan birga Buxoroning Mir Arab madrasasidan ham qobiliyatli talabalar saralab olindi. Ana shunday talabalar qatori Muhammad Sodiq ham maʼhadga o‘tib, 1975 yili birinchi qaldirg‘ochlar safida o‘qishni muvaffaqiyatli bitirdilar.