Ushbu kitobda she'rlari e'tiboringizga havola qilinayotgan Davron Rajab uslubida fikrlab aytadigan bo‘lsak, vaqt shoirni ko‘rsa edi, o‘tmay turgan bo‘lardi. Biroq, shunisi ham borki, Davron o‘zining muxtasar hamda yorug‘ she'rlari bilan g‘ofil vaqtning ko‘zlarini charaqlatib ochadi va har bir harfda, har bir tovushda biz vaqtning tinimsiz suvratlarini ilg‘ashga ulgurib qolamiz. Vaqt ham bamisoli to‘xtab, insonning tuyg‘ulariga mahliyo bo‘lib olgancha, o‘z yo‘lida alanglab davom etadi. Inson va anqoning diydoriga o‘xshaydi bu visol. Har bir she'r esa lahzalarning ana shunday g‘alayonida tarkib topayotgan mo‘'jizalar manzarasidir.